Кӧзоно

Кӧзоноез зол, шуо юн сямо, ӟырдыт мылкыдо, улонлэн пӧртэм вакытъёсаз оскымон адями сярысь. Кӧзоноез зол, шуыны луоз, дыр, кунмы сярысь но, 2014-тӥ арлы йылпумъянъёс лэсьтыса.
 Та ар Россилэн историяз бадӟымесь пытьыос кельтоз. Нырысь ик Крымез берыктонэн. Экономика, политика, геополитика ужпумъёсы выйытэк, одӥгзэ гинэ пусъё. Та лымшор полуостровез кунмылэн бурд улаз выльысь берыктон оскон пыӵатӥз: Россия сярысь сюлмаськон вань. Угось 90-тӥ аръёсты тодэ вайыса, выльысь но выльысь куаляк луоно, кызьы бадӟымъёсыз кивалтӥсьёсмы кизэс мычыса пыдесъяськизы кунсьӧръёс азе. Вунэтӥзы, лэся, кунмы вормиз ук лек фашизмез, песятайёсмы Берлинозь вуизы. 
Пӧртэм вакытъёсы кӧня вормонъёс басьтылэмын вал Крымын но. Пичи дыръям ай Совето вакытэ шуд усиз 40 нунал ӵоже «Артекын» шутэтскыны. Милемды, быдэс Совето Союзысь Крыме люкаськем нылпиосты, мае но ӧз возьматъялэ. Севастопольысь Сапун-гурезь - солэн бамалъёсаз кӧня ожгарчиослэн вирзы кисьтэмын.
 Ялта вӧзысь Ливадийской дворец — отын 1945-тӥ арын тулыспалэ пумиськылӥзы Сталин, Рузвельт но Черчилль. Со сяна но эшшо кӧня синпелетъёс. Котьма шуэ, но асьмелэн сыӵе интыосмы ӧвӧл. Крым инкуазь кадь яркыт, гужем зарезь ву кадь шуныт тодэ ваёнъёс вань улонлы кылизы. Сыӵе мылкыдын уло, дыр, огвакытэ Сьӧд зарезь дурын шутэтскем эшъёсы но — Москваысь, Приморьеысь, Калмыкиысь, Москва, Пермь, Пенза но мукет улосъёсысь, Таджикистанысь, Узбекистанысь (отысь пияшлы Ташкент кушем ним сётӥм вал) эшъёсы. Кин тодэ, вуоно гужем ик ини, оло, шуд усёз выльысь Крыме вуылыны. Кунмылэн «кӧзоноез» гинэ азьланьын но юн мед луоз. 
Юлия Александрова 2014 ар