Одӥг
учыр туж бугыртӥз сюлэмме. Балезино
ёросын со пусъемын та нуналъёсы. Кестым
гуртысь 31 аресъем нылкышно али гинэ
вордскем кыктооссэ люке. Одигзэ кузьма
тодмоезлы. Кузьма кыче ке арбериез
сямен. Бен, кузьымъёс луо пӧртэм,
дуно-дунтэм, но луло муртэ кузьман, со
йыре ик уг пыры. Туж шимес мылкыдъёс
кылдо. Та югдурез пичияк тодыны-чакланы
ас синмыным мыным кылдӥз. Вуылӥ Кестыме,
та семьяе. Кестым пичи гурт ӧвӧл. Улӥсьёсыз
котькыӵеос вань. Йӧн-йӧн кирпич коркаос
но сыло, вӧзазы огшоры пичигес гинэ пу
юртъёс но пумисько. Ӵапак одӥгаз сыӵе
коркан улэ вылӥ верам семья. Пед ласянь
огшоры 4 сэрего пичи корка. Отын кузили
мында улӥсез. Нырысь ик отын улэ со анай,
кудӥз одӥгзэ нылпизэ кузьмано кариськиз.
Со сяна солэн эшшо 5 пиналъёсыз. Отын ик
песянайзы, солэн воргоронэз (сожителез).
Эшшо одӥг воргоронзы вылэм на но, соиз
но пыртос ик, ( 31 аресъем нылкышнолэн
таиз воргоронэз вылэм) но та дыре отысь
со кошкемын ини. Тӥни сыӵе суред. Одӥгез
но воргоронъёс коньдон поттӥсьёс ӧвӧл.
Альфонсъёс- асьсэлы «шуныт» сэрег
шедьтэмын. Али та семьяез вордэ-будэтэ
песянайзы - со 31 аресъем нылкышнолэн
анаез. Солэн пенсиеныз сисько но дӥсясько
та пичи коркан улӥсьёс.
Нош со пичи
коркалэн кузёез кулэмын ини. Со песянайлэн
анаез вал. Юртсэ наследствое кельтымтэ,
коркалэн ужкагазъёсыз ышемен сэрен.
Соин сэрен ик но эшшо коньдонзы тырмымтэен,
та коркан улӥсьёс но юртсылы регистраци
уг лэсьто. Та коркан улӥсь муртъёс
документъёсъя Кестымын улӥсьёс ӧвӧл.
Соослэн прописказы Кировын. Югдур -
тугаськем бугор кадь, пумыз но йылыз
олокытын. Та улон бугор тугаськем понна
табере кылкуто али гинэ югыт дуннее
потэм нуныос - кык пичи дыдыос. Малы
соосты люко? Мугез сыӵе – анайзы уг оскы
ас кужымезлы. Соин ик ас мылкыдызъя
лэсьтэ таӵе кырыж вамыш. Верай ини, та
семья Кестыме вуэмын Кировысь. Соослэн
ваньзылэн ик прописказы отысь 3 патеръем
квартираын. Отын соос квартирантъёс
возё. Тыронъёссы туж трос люкаськемен
улон сэрегзэс арендае сётоно луизы.
Ӵапак со квартирантъёслы ик одӥгез пичи
нуны кузьмамын. Квартирантъёслэн 17
аресъем пиналзы вань ини, но туж потэ
на, пе, эшшо одӥгзэ нылпи ваемзы. Но инмар
уг сёты. Учыр но тупа. Тодмо эшсы кӧто,
эшшо ке кыктоосты нуллэ. Нылпиосыз
тросаз ини. Тӥни озьы ик ӵектон но йыразы
лыктэ, одӥгзэ асьсэлы курыса басьтыны.
Анай нош кема уг ик малпаськы. Роддомысь
кык нылпиен потэ, дораз одӥгеныз бертэ.
Кӧкыын кыллись пичи нуныез адӟыса
синкылиос пото. Малы та улонын чик
янгыштэм пичи нуныос кылкутоно луо
асьмелэн бадӟымъёслэн янгышъёсмы понна?
Юанъёс трос. Малы нылпиен кулэяськисьтэм
адямилэн нылпи ваемез луэ, нош мукетыз
вань улытозяз сое возьма но озьы ик со
мылкыдын сопал дуннее кошке?...
Кӧзоноез
зол, шуо юн сямо, ӟырдыт мылкыдо, улонлэн
пӧртэм вакытъёсаз оскымон адями сярысь.
Кӧзоноез зол, шуыны луоз, дыр, кунмы
сярысь но, 2014-тӥ арлы йылпумъянъёс
лэсьтыса.
Та ар Россилэн историяз
бадӟымесь пытьыос кельтоз. Нырысь ик
Крымез берыктонэн. Экономика, политика,
геополитика ужпумъёсы выйытэк, одӥгзэ
гинэ пусъё. Та лымшор полуостровез
кунмылэн бурд улаз выльысь берыктон
оскон пыӵатӥз: Россия сярысь сюлмаськон
вань. Угось 90-тӥ аръёсты тодэ вайыса,
выльысь но выльысь куаляк луоно, кызьы
бадӟымъёсыз кивалтӥсьёсмы кизэс мычыса
пыдесъяськизы кунсьӧръёс азе. Вунэтӥзы,
лэся, кунмы вормиз ук лек фашизмез,
песятайёсмы Берлинозь вуизы.
Пӧртэм
вакытъёсы кӧня вормонъёс басьтылэмын
вал Крымын но. Пичи дыръям ай Совето
вакытэ шуд усиз 40 нунал ӵоже «Артекын»
шутэтскыны. Милемды, быдэс Совето Союзысь
Крыме люкаськем нылпиосты, мае но ӧз
возьматъялэ. Севастопольысь Сапун-гурезь
- солэн бамалъёсаз кӧня ожгарчиослэн
вирзы кисьтэмын.
Ялта вӧзысь Ливадийской
дворец — отын 1945-тӥ арын тулыспалэ
пумиськылӥзы Сталин, Рузвельт но
Черчилль. Со сяна но эшшо кӧня синпелетъёс.
Котьма шуэ, но асьмелэн сыӵе интыосмы
ӧвӧл. Крым инкуазь кадь яркыт, гужем
зарезь ву кадь шуныт тодэ ваёнъёс вань
улонлы кылизы. Сыӵе мылкыдын уло, дыр,
огвакытэ Сьӧд зарезь дурын шутэтскем
эшъёсы но — Москваысь, Приморьеысь,
Калмыкиысь, Москва, Пермь, Пенза но мукет
улосъёсысь, Таджикистанысь, Узбекистанысь
(отысь пияшлы Ташкент кушем ним сётӥм
вал) эшъёсы. Кин тодэ, вуоно гужем ик
ини, оло, шуд усёз выльысь Крыме вуылыны.
Кунмылэн «кӧзоноез» гинэ азьланьын но
юн мед луоз.
Юлия Александрова 2014 ар
