Толэзь пумын одиг нылкышнолэсь кыли — тани толшорлэн кык нуналэз сяна оз кыльы ни, иське, сое ортчемен лыдъяны луоно. Озьы бере, ортчиз ини тол но, нош тол бере, быдэс ар кошкиз — дасяськоно 2012-тиезлы. Соку мынам йырсиосы пежырскизы — кыче жалятэк но дунъятэк асьмеос учкиськом Инмарен сётэм улон вакытмы шоры! Одиг нунал гинэ овол — быдэс ар оволтэмак карыса куштэмын! Котыр учкытэк, нокинэ адзытэк, бызиськом, бызиськом дыр сьоры. Ужан арня кутскыса уг вутты, возьмаськом солэсь йылпумъяськемзэ, дыртытиськом шутэтскон нуналъеслэсь вуонзэс. Коснуналысен ини возьмаськом выль арнялэсь кутскемзэ — чуказе улыса уже потоно, кыче мыл уг поты, эшшо одиг шутэтскон нунал мед луысал на. Нош луысал ке? Мар ке воштиськысал меда? Малы ке потэ — ой, дыр. Адями укыр дышиз ини кадь вуоноеныз улыны. Визьмо адямиос но тани дышето — изьыны выдыку ик, чуказе нуналэз часэн-минутэн радъяно. Озьытэк, пе, ужъесты лэсьтыса уд вутты. Макем кулэ но пайдаё ужъес сярысь вераськон мынэ, нокин уг юа. Вуттоно, вуттоно, вуттоно. Чукна нылпи садэ дыртоно, жыт отчы дыраз вуон понна бызено. Котрес четлыке пыртэм коньы буйгатскыны уг быгаты.
Паркети нылыным бертыку, со одно ик мае ке адзе. Я гурезьысь нискыламез потэ, я зечырамез. Туж куремысьтыз соглаш луисько ини — ярам, одиг пол нискылты, собере жоггес доре, асьмеос дыртиськом. Со — кык пол. Ярам кык пол. Только кык пол гинэ! Пинал уг чыды, со бызьылэ, парк тыр серекъя, лулысь-сюлмысь шумпотэ; нош куанер анай, интыысьтыз интые легаськыса, амал утча шудо пиналэз дораз нуыны. Анайлы шудонэн йырин овол — доре жоггес бертыса, сиен дасяно, чуказе нуналлы ваньзэ дасяно. Юад ке солэсь, мар умоез вал туннэ нуналлэн, вераны уз тоды, дыр. Со, нунал кутскемлэсь азьвыл ик, возьмаз жытэз. Нош жыт со чуказеын ини. Кытын нош солэн та минутэз,та секундэз? Шуг вераны. Со чидатэк возьма соослэсь ортчемзэс. Солэн дырыз овол соос сярысь малпаськыны. Толон жыт та минутъес солэн нуналлы чаклам ужанрадаз пыртэмын ой вал. Дырыз овол валаны но, та минутъес — солэн та дунне вылын улыны висъям дырызлэн люкетэз шуыса. Шутэтскон нуналъес азьын ини, паймоз, макем жог ортчиз ужан арня шуыса. Выль ар азьын эшъесыныз чошен жожтиськозы, арлэсь ортчемзэ валаса оз вуттэ шуыса. Мар сетиз та ар шуыса юанлы, йырзэс тиялозы, мае тодэ вайыны валатэк. Угось, ар улэмын ой вал, со — ортчытэмын.
Та ласянь туж тунсыко зуч «проводить время» веран. «Проживать» овол, «проводить». «Время» интые «жизнь» пуктид ке, со туж зеч возьматоз, дыр, асьмелэсь дырмылы но огъя улонмылы кыче дун сетэммес. Яке со зэмзэ но вакытлэн куронъесыз-а меда? Вакытлэн, кудизлы кулэ овол адямилэн лулпуш узырлыкез, шумпотонъесыз но сюлмаськонъесыз. Кудиз ваньзэ эскере шоро-куспо лыдпусъесъя, нимысьтыз кылдытэм мерттэтъесъя, формулаосъя, адямилэн (нош ик) шоро-куспо улон арлыдызъя, солэн кузьдалаезъя. Соостэк уг но луы, дыр. Нош котькуд нимаз адямилэн улонэз со лыдпусъес сьоры ышонэз, яке со лыдпусъесты пуштросэн тырмытонэз нырысь ик аслэсьтыз адямилэсь потэ. Соин ик ойдолэ уломе али но татын!
Комментариев нет:
Отправить комментарий